Faallooyinka

ABWAAN HADRAAWI IYO AWOODDA EREYGA

WAA kuma Hadraawi?
Maxaa u yeelay qiimaha iyo sumcada Weyn?
Waa maxay Duruusta laga kororsaday socdaalka Hadraawi ku maray inta badan Gobolada Jamhuuriyadii Soomaaliya ee kala daadsan?
Hadraawi waa ninka is baray ee ay jecel yihiin malaayiin af soomaaliga ku hadasha
Haddii la yiraahdo hala sheego qofka Hadwaawi yahay, jawaabtu way kala duwanaaneysaa oo waxay ku xiran tahay qofka jawaabaya.
Ma qof yaraantiisii, hana qaadkiisii ilaa maanta yaqaan baa?, ma qof kolkii uu Xamar soo galay bartay baa?, Ma qof Goobaha Waxbarashada iyo iyo masraxyada ku bartay baa? Ma qof Deeley iyo Siinley uun maqlay baa? Mise qof aan weligii arag laakiin ka mid ah malaayiinta af Soomaaliga ku hadla ee ku qancay sida quruxda badan ee af Soomaaliga waxa uu doono ugu cabiro?.
Anigu qeybtan danbe ayaan ka mid ahay, haddii aan isku dayo inaan Hadraawi tilmaamo waxaan dhihi lahaa: Run iyo Geesinimo, Aqoon iyo Aftahanimo dadnimo iyo Soomaalinimo.
Haddii aan jilciyo waxay noqoneysaa: Hadraawi waa nin runta ka hadla oo aan ka baqin xataa haddii naftiisa khatar muuqata ku galeyso.
Waa nin aqoon qoto dheer leh oo si hagaagsan dadka ugu sheegi kara dareenkiisa.
Hadraawi waa ruux damqasho iyo damiir nool leh oo ay damqeyso ama laxwinayso dhib kasta oo Soomaali kasta heysta.
Maxaa u yeelay sumcadda weyn ee dadku ku jeclaadeen?
Waxay dareemeen jacaylka uu dadka Soomaalida ah u qabo kolkaas ayay iyaguna jeclaadeen!!.
waxaa dadka soo jiitay runta iyo xaqa, sow diintu ma ammaanin qofka qofka erey xaq ah ka sheega Suldaan macangag ah hortiisa? Haa!!.
Waqti dadku cabbursanaayeen ayuu dareenkooda ka tarjumay oo si run ah asigoo aan baqin waqti dadkoo dhami baqayeen!!
Wuxuu jecel yahay dadka Soomaaliyeed iyo dadkiisa kolkaas ayay iyaguna jeclaadeen!
Ereyada af Soomaaliga ayuu si sax ah oo qurux badan u adeegsadaa kolkaas ayay dadku macaansadeen oo jecleysteen.
Wuxuu neceb yahay dulmiga, awood ku faanka, qabweynida iyo xaasidnimada.
Wuxuu ka weyneystaa dhaqan xumida, musuqmaasuqa, laaluushka iyo awoodda xafiisyada oo si qaldan loo isticmaalo.
Suugaanleyda carabtu waxay yiraahdaan: Bamka Atomiga waxaa ka xoog weyn eray run ah oo la adeegsaday waqtigii ku haboonaa!!.
Waxaan u maleynayaa inay taas tahay waxa ereyada Hadraawi awooda iyo lixaadka xad dhaafka ah u yeelay.
Sow ma xusuusatida sidii ereyadiiu u gilgileen xukunkii adkaa ee millateriga ee Soomaaliya xoogga ku heystay 1969---1990-kii.
Taliskaas waxa riday ma aha oo kaliya wiilashii naftooda biimeeyay ee Xabbada isku dhigay ee waxaa ka horeeyay feker dhisan oo dadka u tilmaamayay halka ay ka socoto dhibtii haysatay iyo waliba tilmaam waafi ah oo calaamadeyneysa jidkii la mari lahaa kolkii ay jidadkii kale soo awdmeen!!.
Markii lagu guuleystay in la iska dulqaado xamuulkii cuslaa ee taliskii millateriga waxaa lagu fashilmay in la dhiso bedelka wanaagsan, waxaa la marayaa dhowr iyo toban sano oo tiih iyo talowaa ah!!.
Hadraawi oo aynu wada qeybsanay taaha iyo xanuunkii ka dhashay jowrkii taliskii millateriga waxaan is lahayn isaga iyo raggii ay ka mid ahaayeen Cabdi Qeys iyo Macallin Gaariye way idinla qeybsan doonaan baadi doonka xalka iyo sidii dhibta looga bixi lahaa waxaan is lahayn dareenkooda waa ka weyn yahay Burco iyo Hargeysa!!
Waxay nala ahayd inay qalbigooda ku taal, tuulo kasta iyo dhul kasta oo Soomaaliyeed!! iyo bulsho kasta oo Soomaaliyeed jiho kasta ha xigeene!!
Socdaalkii Hadraawi waxaan u maleynayaa inuu ka jawaabayay dareenka noocaas ah.
Haddaba maxaa laga kororsaday socdaalkii barakeysnaa ee Abwaan Hadraawi??.
1. In Damiirka Soomaalinimo weli nool yahay oo dadku sida la moodayo aysan u nasaqmin, maxaa taas caddeynaya?!. Hadraawi dhulalka uu maray waxaa ugu danbeysay dhowr iyo labaatan sano, mudadaas waxaa socday colaado, qax iyo is naceyb intuba Soomaalida ma ilowsiin waxa Hadraawi yahay iyo 'Qiyamka' wanaagsan ee uu u taagan yahay.
2. In qofku dadka kasban karo oo quluubtooda hanan karo asigoo aan u marin jid xun sida khiyaamo, laaluush iyo baqdin gelin.
3. In ereyo si hagaagsan loo yiri ka xoog iyo saameyn weyn yihiin dhammaan noocyada hubka ee madax-kooxeedyada Soomaaliya.
4. in Soomaalida waqooyi ee uu ka soo jeedo Maxamed Ibraahim aysan dhammaantood ahayn Waraabe iyo Riyaale ee laga helayo kumanyaal aaminsan in Mushaani iyo Shalambood uu dhulkoodii yahay sida Maxaas iyo Moqokori dhulkoodi u yahay.
Waxa Qoray:
Yusuf Aybakar Shadoor

SOCDAALKII NABADDA EE ABWAAN HADRAAWI IYO QAARADA YURUB

Abwaanka caanka ah ee Soomaaliyeed Maxamed Ibraarim Warsame (Hadraawi) ayaa lugtii labaad ee socdaalkiisa NABADDA ku maraya Qaarada Yurub, isagoo Soomaalida qurbaha ku nool kala hadlaya xaalada dalkii iyo sida looga bixi karo musiibada ku habsatay Soomaaliya.
Abwaan Hadraawi oo si weyn loogu soo dhoweeyay meel kastoo uu tago ayaa dadkii Soomaaliyeed ee uu la kulmay ku aaqeysiiyay Murti iyo waano ku saabsan qiimaha dalkii hooyo iyo sidii wax loogu qaban lahaa dhibaatada ay dadkiisii ku jiraan, wuxuuna ahaa tusaalaha ugu weyn ee uu gudbinayay NABADEYNTA DALKA.
Waxaa u qorsheysan inuu tago dalalka Yurub ee Soomaalidu u badan tahay oo qaar badan oo ka mida uu soo maray, waxayna wararka naga soo gaaraya socdaalkiisa sheegayaan inay socdaan dalabka Soomaalida dooneysa inuu soo gaaro.

WARBIXIN KU SAABSAN QAABKA LOOGA GANACSADO TAHRIIBKA LIIBIYA ILAA TALYAANIGA

Tahriibku wuxuu noqday shaqo weyn oo kumanaan Doolar laga tacbo dad badan oo ku howlan daabulka muhaajiriinta nolol doonka ahba ay ku lacageysteen, halka qaar kale ay noloshooda ku waayeen iyagoo doonaya inay heleen nolol wanaagsan oo Yurub mar qura indhaha saaraan.
Baaritaan aanu ku sameynay qaabka looga ganacsado tahriibka dadka gaar ahaan kuwa Liibiya ka baxa ayay ka soo baxday in dadka ku howlan tahriibkaasi aanay dalaalo ku lahayn gudaha Soomaaliya, balse marka aad tagto dalka Liibiya aad la kulmeyso, qaabka Liibiya loo tago ayaa aad u sahlan dhammaan waxaa laga geli karaa dalalka deriska la ah ama dhinaca cirka oo diyaarad aad u raaci karto mana adka inaad dal-ku-gal ama Viso Liibiyaan ah hesho, Muqdisho oo ugu liidata waxaa laga safaarada ku taala ay bixisaa Fiisooyin suuqa laga heli karo oo aanay qiimahoodu ka badneyn 1000 Doolar.
Marka uu qofka tahriib doonka ah Liibiya tago wuxuu isla markiiba helayaa dad fara badan oo ay isku lug darsadaan taasoo dhiirigelin u noqoneysa, iminkadan la joogo waxaa dekadda Suwaarah ee Liibiya laga heli karaa kumanaan ruux oo Soomaali iyo Afrikaan kaleba ah oo sugaya inay tahriibaan si ay u galaan xeebaha Talyaaniga.
Waxaa dad laga qaadaa lacag dhan 1000 doolar si Doon loogu saaro Talyaaniga, waxaa kaloo jira gorgortan aad geli karto inkastoo suuqa aanay badeecad caajis ah jirin oo la kala socdo, haddana aad ayay u yar tahay inaad hesho Doon 1000 doolar ka yar, dadka ayaadna moodaa inay raali ka yihiin oo dhinacaas aanay su'aal ka jirin.
Haddii aan is oran lahayd waxaa jira qabasho ama ka hortag intii halkaasi ka tahriibtay ee nasiibka u yeelatay inay Yurub galaan waxay sheegeen inaysan arag howlgal daacad ah oo lagu hor istaagayp tahtiibka, guud ahaan qofku waxay ku qaadaneysaa ilaa 3000 oo doolar inuu Muqdisho ilaa xeebaha Talyaaniga ku gaaro laakiin halista ka sokeysa ayaa dad badan u qasabtay inay dib uga fekeraan.

W/Qoray: Shariif Macalin